街市阿姐都催生B,岑丽香:不要给我大压力!

岑麗香、朱千雪及岑杏賢昨日出席無綫活動，跟現場小朋友相處融合，有小朋友高呼最鍾意玩香香公主，香香笑言：「小朋友可能當我是公仔，都開心的，最緊要他們肯玩，比匿埋一邊好。我經常和小朋友合作，也玩得好開心，無什麼壓力，最鍾意他們思想直接和單純。」

那麼喜歡小朋友，為何不盡快生育？岑麗香說︰「暫時玩朋友的孩子先，當是練習。生BB只能順其自然，有些事不能強迫，不可以令自己太大壓力。而且我還是個細路，要學識湊細路至得。其實去到那裏，人人也叫我快點生，連去街市購物時，阿姐都叫我快點生，唔該大家不要給我這麼大壓力。」

香香指好友鍾嘉欣及其他朋友都有給予意見，「我發覺未當父母的會經常問我幾時生，當了父母的就叫我不要生住，說生活會180度改變，要真的玩盡了，但嘉欣就和我分享說有了BB很開心。」

朱千雪 (Tracy)同小朋友一齊玩遊戲，提到近日有報道一個嫲嫲帶孫女出街時，因為孫女扭計買糖，嫲嫲竟怒打孫女，更兜腳踢，引起網民熱烈討論。Tracy表示自己無見過人在公眾地方打小朋友，但就見過一些父母好惡咁喝罵個小朋友，她都會忍唔住望一望。Tracy當然不贊成這些咁極端的管教方式，認為小朋友要從小教導，但不應吓吓打罵，一定要取得平衡。

Tracy說：「我自己父母管教好嚴厲，佢哋無打過我，但係喺教育我哋三姊妹方面做得好好。有啲小朋友出街食飯時喺度喊，可以帶出餐廳外面畀佢企，等佢喊完先返返入去，自己細個嗰時都係咁，唔好騷擾到人哋。我好開心爹地媽咪家教咁好，家庭教育真係好緊要，就算我依家咁大個人，佢哋都會時時提醒我，好多生活上嘅嘢例如喺人屋企食飯要幫手執枱洗碗，食飯要叫人，揸筷子要揸得啱等等。我次次去男朋友屋企食飯都會主動幫手執枱洗碗。」

Tracy認為小朋友從細個就要開始教，對於有些人覺得「佢哋咁細個唔識㗎，大個先教啦」，她並不認同：「唔會唔識，就算細個唔識都可以做咗先，例如要雙手接嘢或者畀嘢人，我細個都唔明點解，但都做咗先，大咗自然會明自，原來咁樣係尊重人同有禮貌。」她笑言父母經常對她的提點亦令她有壓力要做好自己：「總之我一定唔會失禮人。」